Kia herea te rangi ki te whenua, te whenua ki te rangi
E te Wāhi Ngaro tukua mai rā ō tauwhirotanga ki runga ki ngā
iwi e īnoi atu nei
E whakawhetai atu nei hoki mōu e manaaki mai ana i a
mātou katoa
Tae noa ki a Kīngi Tūheitia e noho mai ana i te ahurewa tapu i
whakaritea ai e ngā mana nui
Paimārire
Ko te mapu roa mōteatea mō koutou e te iwi nui tonu kua ngaro
e kore e mutu
Tāoki mai rā i ngā one whakanewha o tawhiti nui
Ko te tai o Wai-whakaoti atu ki a rātou
Ko te tai o Wai-whakaora ki a tātou
Tihē mauri ora!
E ngā maunga tūparengahua, e ngā wai whēteketeke o ngā
kāwai nui, o ngā kāwai roa, tēnā rā koutou katoa.
Nei anō ia Te Pūrongo e puta nei ki te ao o te tūmatanui, ki
te ao o te tūnekeneke kia noho mai rā ngā whakariterite
me ngā whakahaere a Te Wānanga o Aotearoa i te awatea
o te māramatanga, o te mōhio. Ahakoa ia ngā tini huarahi e
whakatakotongia ana i roto i ngā tini āhuatanga o tēnā mahi, o
tēnā mahi, kotahi tonu te aronga: ko te oranga o ngāi tauira. Mā
konā e whai hua ai te katoa, ā, ko tātou rā hoki. Nō konei a mihi
ka rere, tēnā koutou katoa.
maioha
