Tuia i runga, tuia i raro, ka rongo te
pō, ka rongo te ao, i te kōrero, i te
wānanga
Kei te wānangananga te pō, kei te
wānangananga te ao
E ngā tauira whakamaua kia tina!
Matika ake te kupu tapu ki te runga
rawa, he tauwhirotanga nui ka tau
iho ki runga ki te whenua, tatū noa
ki a Kīngi Tuheitia e noho ana i te
taumata. Huihuia atu koutou kei aku
amokura ki te taiopenga wairua, ki
reira koutou okioki atu ai. E kore e
mutu te tangi, whakangaro atu rā. Ko
te akaaka o te rangi ki a rātou, ko te
akaaka o te whenua ki a tātou, tēnā rā
tātou katoa.
Kia rere tonu te komihi ki runga i ngā
hau rangaranga, ki ngā toipuhipuhi o
tērā whenua, tae noa ki ngā wai nui
me ngā wai roa o tēnā takiwā, o tēnā
whaitua, o tēnā whāwhārua me ōna
kāwai whakaheke. Kōpakina ana hoki
te kupu whakaoha e te aroha o Te
Wānanga o Aotearoa e whakamānawa
atu nei mō koutou e tautoko tonu nei i
te kaupapa, tēnā rā koutou katoa.
Nei anō Te Pūrongo te whakarewa
atu nā hei wherawhera mā koutou,
hei wānanga mā koutou, me kore
noa e kite i ngā whakahaerenga a Te
Wānanga o Aotearoa i te tau kua huri
me te kite i te ahunga o Te Wānanga o
Aotearoa i runga i ngā huanui o te wā.
Kāti mai rā i koneki kei aku rangatira,
tēnā rā koutou katoa.
maioha
He
Tamiaho Herangi-Searancke
at the Pōwhiri for incoming
Te Taiurungi Jim Mather
